Apa dorang kita yang pangge?
Karna tana ini torang punya
Samua kobong
Samua padi
Samua bungang
Torang so hidop ribuan taong
Makang deng baku kase makang
Manyanyi deng manari
Torang pe anak-anak nyanda ja pake alas kaki
Barmaeng balari kasana-kamari
Tana ini torang yang punya!
Apa dorang ngana yang pangge?
Karna ruma ini torang yang punya
Samu depe tangga
Samua depe pintu deng jandela
Tiang-tiang
Pores deng soldor
Koi tampa torang da selahir deng kase lahir
Arang deng asap dodika
Bara api
Ruma ini torang yang punya!
Bukang!
Bukang torang yang pangge pa dorang!
No sapa dang?
Dorang datang dari laut
Jao lewat-lewat tari tasik deng tanjung
Dari sabla utara
Dari sabla selatan
Dari sabla timur
Dari sabla barat:
Dari tampa-tampa mati!
Dulu dorang datang minta makang
Kong torang kase akang dorang tampa
Kong torang kase akang dorang ruma
Kong torang kase akang dorang kobong deng sawa
Karna so bagitu torang pe dotu-dotu da se ajar:
Bae-bae pa tamu supaya dorang le bae-bae pa torang
Kong dorang mulai makang sampe basar
Mar karna skarang dorang so rasa basar
So mulai jaga malawang
So mulai lupa sapa tu tana pe tuang
So sama deng piara patola
So dorang kote tu setang-setang!
Mar dorang kote nyanda mo kanyang-kanyang
Mulai dorang bale makang pa torang
Torang pe tana
Torang pe ruma
Torang pe anak-anak
Torang!
O, tuang!
So talanggar ini komang!
No skarang:
Kase kaluar tu lilang yang ngana da simpang
Kita le somo pi gale tu tumbak da tatanang
Tu kaeng mera yang torang dulu
torang tukar deng agama palang
Karna for torang pe tana deng ruma
Skarang torang so musti mara!
I Yayat U Santi!
Langganan:
Postingan (Atom)
