Puisi-Puisi Dari Buku Antologi Puisi Bahasa Manado "999" - Terbitan 2005

Cuma 50

Masi fruk tu waktu
Di trotoar Bole muka Ritzy
Tambio so mulai pasang gaya
Satu, dua, tiga...
Ado banya no!
Deng muka-muka tabal bahodeng
Tangisi-ngisi deng brapa om-om

Blum talalu lat kong Terano itang sandar
Dapa lia yang bawa bukang orang sini
Itang kong balogat mana sto
Dia iko muat tu parampuang paling gaga
Trus tindis gas kaluar kota
Paling kwa kalo nyanda Tambulinas
Dorang indehoi di Kasuang
Pa Yoyo pe cottage sto

So komang tenga malam dorang baru babale
Cuma drop tu parampuang kong langsung pigi
Mar dapa lia tu parampuang kurang sanang
Iko momake di muka depe tamang-tamang
“Pe soe le kita”
“pake Terano mar bayar cuma 50”
“Setang le”
“Lebe bae so bamapalus di Ranotongkor!”








Rex Orgasmus

Ombong masi tabal di Masarang
Matahari somu-somu, blum stenga anam
Dingin bacucu tumbus tulang
Ini Rurukan tamang!

Pe pica jam anam
Samua so tarang
Dapa lia enteru tu kampung pe pemandangan
Memang no, torang pe tana nya’ da lawang

So ini no tu bilang
Biar nyanda badapa tadi malang
Mar dapa rasa no tu sanang
Lebe dari tabuang...



















Palakat

Pang!
Di skit pas testa
Panjahat rubu
Barol untung
INDOVISION, 5 Desember 2004

Cek!
Dia bla pas gargantang
Ade taplaka
Kaka tumingkas
POSKO, 6 Desember 2004






















Retro Epic

Ini cirita tentang kita
Waktu masi skola di SMA taong 1992

Dapa inga tu dulu-dulu
Waktu katu kita masi sadiki muda
Jaman blum tau hidop pe siksa
Tu waktu torang nyanda farek
Kalou nyanda singga mega mol
Apa lagi ka hai ki ato gacho
Tiap malam minggu bagini
Paling makang pisang ato mi
Mangada plein tikala

Torang ley blum bawa-bawa hp
So mujur tu ada telpon ruma
Kalo perlu kurang cari saratus
Kong lari-lari ka telepon umum
For mo telepon kape-kape Memora
Itu komang torang sorasa

Amper tiap hari barmaeng bola
Di skola jam bersenang sampe bel maso
Abis itu tu klas kurang bobou naga
Lantarang samua laki-laki so mandi suar
Mar yang penting torang nyanda saki mata
Haga-haga televisi deng jam-jam
Main winning kong bayar ley

Memang torang kala gaya katu no
Blum ja bapake tu gombrang, jangkis,
Apalagi span-span
Blum ada tu nama gaul, choi-choi,
Apalagi dugem

Kalou takumpul deng tamang-tamang
Paling bakuti gitar
Scorpions, Bonjovi, Stryper, Guns ato Metallica
So rasa jago kalo so hafal
Depe pemain pe nama
Blum ada Corner, Musro, en tu sagala pub kasiang

Mar sadap kwa tu dulu
Pisang 50, frak 150, bakso 250, bola plastik 500, cokakola blek 700, kaset 2000, dragon 5000, ...
Samua kasiang masih mura
Cuma komang memang masi siksa
Tu nama cari maitua
Musti banya bardoa deng bakaca
Soalnya dorang blum ja lia oto!
Lia henpon lia merek
Nya’ rupa skarang do ce
Parampuang kurang ja muat dari pinggir jalang!

















Minahasan Dream I

Pulang-pulang kobong Utu iko banting pacol
Enter sabel dia le iko lego
Untung tasampel para-para
Mace takage amper kase tabuang
Tu aer madidi baru angka dari dodika
“cuki le tu pemerenta
so iko akang cucu dorang pe muka
mar tanang cingke, tanang kalapa,
tanang padi, tanang vanili,
samua so sama dorang bli pe mura
beso-beso kalo dorang bale kampanya
kurang dorang tu torang mo tanang!”
Buang kaluar dari kamar
Hari ini dia tako maso skola
SMU Negeri Satu Tareran
“pa, kong kapan dang tu doi skola
napa enci kurang tagi-tagi...”
















Minahasan Dream II

Unggu kurang da tutu-tutu depe muka
Lampu tustel wartawan beking silau
Dari blakang mesin ketik polisi mulai batanya
“nama?!”
“Unggu Kaparang”
“umur?”
“19 taong”
“asal?”
“Koreng”
“kenapa kamu mau dikirim ke Papua?”
“sala-sala no pak, mo cari doi...”

pas dia bilang itu
Kambuna brangkat dari Bitung ka Jayapura
Diatas kapal ada Siska, Yohana, Mince, Esther, Yudit, Marike, Aneke, Marlen, ...

















Minahasan Dream III

Talikuran deng Sendangan so baku jaga
Tadi malam maikel orang da tikang
Di disko tana abis pesta kaweng
So bawa lari ka Bethesda mar nyanda riki

Pana wayer, cakram, sabel tiga strep
So tinggal mo cabu
“baku abis jo!”
so mulai ada tu baba kuku

Padahal tu dua kampung masi satu tuur
cek-para cek tu da batikang masi kana kasungkul

Ado kasiang...
Apa jo tu torang pe dotu-dotu mo bilang
Satu dara mar kurang baku-baku makang

















Soputan

Lion Air dari Jakarta so tasopu
Sam Ratulangi pe rame
Sopir taksi
Buruh angka barang
Orang bajemput fol
Tanta Polin badiri pas regel
Panumpang baru ja baturung
Opa Bert badiri di sei
Ada karu bakuriki datang
Biar nyanda talalu nyaman
Batunggu amper dua jam
“odo sana tu toya’ang!”
Opa Bert so dapa lia pa Maxi
Baturung-turung tampa ambe bagasi
Bole jo kote pace pe mata tudia
Padahal masi jao antara dinding kaca

“so lebe gode ci”
Tanta polin ley dapa lia somore
Baru lay satu taong da blayar
Rupa jo so baku pisa deng pulu taong

“wah, udah lama nih nunggunya?
“abis tadi kelamaan di transit sih”
“trus, pada naek apa kesininya?
“ampun, koq disini panas ya, gitu loh”
O rekey!
So lupa dang
Pusa da tambung di bawa Soputan




Manado, Ado Pe Sadap!

Pe sadap ja tinggal di Manado
Ngana mo kamana-mana gampang
Nae mikro frak saribu
So dari ujung-ka ujung
Kacuali kalo taprop di 45
Satu jam oto bajalang satu meter
Deng pas Natal taong baru
Sopir minta bayar dua kali lipa

Pe sadap ja tinggal di Manado
Depe udara nya’ panas nya’ dinging
Anging sadap batiop di pohong bulu
Matahari pe gaga ujang nya’ lama
Kacuali kalo musim barat
Seng ruma kurang punggu kampung sabla
Omba pe basar Ikang pe mahal
Kuala guhi enter karamba anyor

Pe sadap ja tinggal di manado
Di kampung masi baku-baku bantu
Ba mapalus kong baku-baku bae
Samua basudara kong baku-baku sayang
Kacuali sala maso orang pe kampung
Apa lagi so langgar jam 9
Kalo nyanda dapa pajak dapa pulungku
Lebe soe cumu slamat malam

Pe sadap ja tinggal di Manado
Depe orang samua taat baibada
Samua agama baku mangarti
Pemerenta bamoral deng tau atoran
Kacuali di kasus mbh geit
Amusemen so mancari di mana-mana

Captikus di amper samua warong
Tambio sport tafiaro di jalang